▶在网上看到这么一篇奉贤话短文，一些字词还是不能理解，读起来疙疙瘩瘩，有些累。有兴趣的朋友来试一下，录下来，发给我，让网友们听听谁说得最土最动听。
阿伲屋里厢登拉南桥东爿爿一个宅基浪，家东头有拾许棵白眼树，树桠张浪度仔好带只麻将。
门前头有条河浜，浜滩边头种仔交关水落小菜，有落苏、洋山芋、饭瓜、寒豆拉啥，什加吃勿脱，奈末叫五侬格男将，勒拉早晨头踏仔脚踏车咾到镇浪厢去卖。
寻俩个小铜钿蛮好格，手头总管活龙相眼，啊实加是买起末事来肉麻得来，实哪搿排后生家是手豪阔勒斜气，啥叫啥一段段路末啊要乘叉头，吃顿饭末板要到饭馆里去，奈叫话话吧，怪是啊怪勿得伊拉，搿在工钿大脱杭尽拉哉。
阿伲小喊里时，粥啊勿着杠，真是苦来咾眼泪汤汤点，喔唷，老里八早格事体勿要话哉，迭抢大家开心来，伲乡下种田人格日脚过勒脱镇浪人勿差啥。
五子要讨娘子哉，囡末要拨出去哉，小外孙末要到学堂里读书去哉，狄聂天是伲大大阿奶送伊去格，狄个小囡倒蛮识货格，看见先生就鞠仔个躬，边头个人笑勒什加眼乌啊要汆出来哉。
一歇歇末，一部小包车停拉伲脚跟头，车子浪走落来一个囡秋头，啥末事，是阿伲格阿侄末，狄个囡晓得五哪勒拉掰段，加老定为开仔车子接阿伲回转去。
狄个辰光，已经日中心里哉，肚皮有眼饿啊哉，奈末伲几家头就到马路对过格小店里去吃仔几碗头面，又吃仔几根油石管，伲老人出去白相总管做人家来，迭趟啊不过吃脱啥四十元，拨勒老板一张五十元头，找出来侪是铅角子。就梗，放拉拎包里算勒，加能样子末总算止止饿，啊实加是饿勒臭要死。
吃仔饭末顺带便到街路里白相一转，冷陌省头里听见呯！嘭！勿壳落是一爿店新开张，勒拉放高升搭仔放小炮仗，阿伲几家头走过去张张看，是买衣裳格，价钿一眼啊勿糨，话咾一件薄来希格领衣啊要卖头两百元，勒拉捣浆糊。
狄格辰光，手机响哉，是新妇打来格，讲屋里厢亲眷来哉，叫五哪豪速回转去，阿伲到小山店里买瓶烧酒，再买眼长生果、西瓜子、水果糖拉啥，再到小菜场里去买啥四条梅鲤搭仔省五包细粉，买好末事要想回转去勒末，巧勒斜巧，能好勒拉街路里碰着隔壁头格婶妈，问伊到啥场化去，实伊话，狄两日上不上，发寒热咾肚里惹，肚皮里也不适意，五侬脱伊讲，实侬衙勿得格，快一眼到医院里去看毛病，后头来，是阿伲一部小包车送伊到医院去格。
